بيتي الثاني .. برتاح هناك
Monday, July 20, 2009
جيت
وعارفه ان الكل زعلان مني
وماكنتش ناويه اجي اصلا
بس قلت افرحكم معايا
انا نجحت الحمد لله
وبقيت فى سنه رابعه
فاضلي سنه واحده بس واتخرج
وقدامي حاجات كتير جدا لازم اعملها فى السنه دي
عايزاكم كلكم تدعولي
بجد مش عارفه اشكر ربنا ازاي
مهما قولت الحمد لله وشكرته مش هيبقى زي ما ربنا وقف جنبي خالص
انا بحبك اوي يا رب
اللهم لك الحمد كما ينبغي لجلال وجهك وعظيم سلطانك
السنه دي بجد اول مره افرح بنتيجه ليا كده بعد الثانوية العامة
مع انها مش احلى النتايج ولا حاجه
بالعكس كمان ممكن تكون اقلهم
بس فعلا السنه دي كنت فاقده الامل نهائي
ولأول مره فى حياتي جالي احساس اني ممكن مااعديش منها على خير
بس الحمد لله ربنا كريم اوووووووي اوووووووووي اوووووووووي
_______________
حاجه بقى بره الموضوع كده
بس لازم اكتبها هنا ودلوقتي
حاجه مكتوبه لحد هو عارف نفسه كويس اوي
بجد فرحتي كانت هتبقى اكتر بكتير لو لقيت منك ريأكشن غير ده
مش عارفه ليه العلاقة بينا وصلت لكده
نفسي اعرف انا غلطت فى ايه
او انا اتغيرت فى ايه
بجد اللى حصل النهارده ده ضيع عليا فرحتي وكل اللى حواليا لاحظو ده
وبردو مش فاهمه السبب
ليييييييه كبيره اوي بتدور جوايا ومحتاجه اعرفلها اجابه
وكل الاجابات فعلا مش مقنعه
ومش هتدي اكتير من 50% من الراحة المطلوبة
بجد فعلا زعلانه اوي
وفعلا ضيعت فرحتي
Thursday, April 2, 2009
"مصطفى"
مصطفى شاب
زي اي شاب
مواليد 9 يوليو 1987
فلسطيني
بس كان عايش في مصر
حياته كانت زي حياة اي لاجئ فلسطيني
جواه جرح كبير
بس كان ديماً بيثبتلنا انه اكبر من الجرح ده
عيلته تقريبا كلها كانت بعيده عنه
كل واحد في بلد
شاف كتير اوي
حياته كانت مليانه بالألم لحد كبير
ولكنه عمره ما فقد الأمل
من سنتين مصطفى اصيب بنوع من انواع السرطان
نوع مش مشهور اوي
بيصيب الغدد الليمفاوية على قد ما فهمت
المهم
مصطفى في الفترة دي كان قريب اوي من ربنا
بجد ما شاء الله عليه
على قد الألم اللى كان بيشوفه على قد ماهو كان صابر وراضي
كان كل اما اكلمه يقولي :
يابنتي ده قدر ربنا
هو انا هعترض على حكمه
وده تكفير ذنوب يمكن ربنا يغفرلي
بجد انسان رائع بكل معنى الكلمة
اخر الصدمات اللى شافها مصطفى كانت في الاحداث بتاعت غزة اللى فاتت
استشهاد عمته وزوجها واطفالها كلهم
بجد اتقبل الموقف بشجاعه ماتتوصفش
وكان كل اما يتكلم يقول هم راحو عند رب كريم
احنا اللى لسه بنتعذب
يا بختهم ماتو شهداء
ياريتني مكانهم
........
واهو بقى مكانهم
مصطفى اتوفي امبارح
واللى اعرفه ان مريض السرطان لو اتوفى بيه بيكون شهيد
واحسبه عند الله شهيد
.............
مش قادره اقول اكتر من كده
غير ربنا يرحمه
واحتسبه عند الله في الفردوس الأعلى
ادعوله يا جماعه
مصطفى يستاهل كل خير
_____________
اصعب بوست كتبته من بدايه اما عرفت عالم التدوين
كان بيحب يدخل مدونتي :(
ربنا يرحمك يا مصطفى :(
ربنا يصبر اهلك
ويصبرني
وتكون في الجنه ونعيمها
يااااااااااااااااااااااااااااااااااااااااااااارب
Thursday, March 5, 2009
مدلعاكم اخر دلع
تلت بوستات في تلت ايام
والبوست ده مليان جاتوه وتورتة وحاجة ساقعة
مش مخليه نفسكم في حاجه
بس قبل اما تمدو ايدكم على حاجه
اللى مش هيقول مبرووووووووووووووك من قلبه ويجيب هديه حلوه ياخد الماوس بتاعه ويمشي من هنا
بسم الله الرحمن الرحيم
قال ايه
انا نجحت هههههههههههه
اه والله مش كذبة ابريل
شوفتو بقى
بعد عذاب الامتحانات اللى يقهر الجبل
الحمد لله ربنا عوضني
وعوضني بتقدير ماكنتش احلم بيه اصلا السنه دي
يااما انت كريم يارب
قد ايه انت كريم اوي اوي اوي
اللهم لك الحمد كما ينبغي لجلال وجهك وعظيم سلطانك
لا اله الا انت سبحانك اني كنت من الظالمين
يلا اسيبكم مع الجاتوه والتورته والحاجه الساقعه
واياكم تنسو الهدايا
هخسركم
هههههههههه
كان معكم لوليتا هانم الفرحانه اوي
" تاتش وود "
ربنا يديم عليا فرحتي و
يفرحكم كلكم
وكل حد فيكم مستنى لنتيجه تطلعله بأحسن ماهو منتظرها
Wednesday, October 1, 2008
بس وراكم وراكم والزمن طووووووووووووووووووويل
صحيت الصبح بدري بعد الفجر
اخدت شاور ولبست لبس العيد
وبعدها نزلت صليت العيد
وسلمت على الجيران والاصدقاء والناس اللى مااعرفهومش كمان
- طلعت مشهورة وانا مااعرفش-
ناس كتيره عماله تسلم عليا وانا عامله عبيطه
وبابتي جابلي امبارح بلونه اخضره كبيره
قعدت بعد الصلاة انفخ فيها لحد اما نفسي اتقطع
شكله بيعذبني الراجل ده
صحيح عامل فيها مش واخد باله ومش اداني العيدية بس هروح اتخانق معاه كمان شويه
ووقفت فى البكونه اتفرج على الاطفال وهم لابسين اللبس الجديد صحيح كلهم لابسين الاوان مالهاش اى علاقه ببعض
وصحيح ان نصهم لابسين صيفي ونصهم لابس شتوي
بس شكلهم حلوملامحهم بتقول العيد فرحة
الحاجه الوحشه بقى اللى في العيد اني مش عارفه اركب عجل هههههه
اه والله من السنه اللى فاتت ماركبتش عجله
يلا ماعلينا
بجد انا زعلانه جدا ان رمضان خلص
خلص بسرعه اوى اوى
لسه بدري اوي يا شهر الصيام
الله اعلم ان كنا هنشوفك تاني ولا لأ
بس بجد رمضان ده استفادت منه كتير كتير
اقدر اقول عليه احلي رمضان في حياتي اللى فاتت
اتغيرت اوووووووووى من جوه
حاسه اني اتنقيت وودديت قلبي لللوندري ههههه
اه بجد والله
وياااااااااااااريت كلكم كلكم تدعولي ان الدعوتين اللى بدعيهم من اول رمضان ساعة الفطار وف التارويح وقيام الليل والتهجد يتحققو بسرعه اووووووووووووووووووووووووووووووووووووووووووووووووووووووووووووووووووووووووووووووووووووى بعد العيد
وعلى الرغم انس فعلا مش حاسة بفرحة العيد
بس فرحانه لاني قررت مااخرجش من باب الشقة فى العيد علشان الزحمة
زعلانه علشان مش ده العيد بتاع زمان
لما كنا بننزل بعد الفجر نروح عند جدتي او بابتي ومامتي يسيبوني عندها من بالليل واصحي جري البس لبس العيد وننزل انا وكل الجيران اصحابي نصلي العيد فى المسجد وناخد العيدية من كل البشر اللى بتصلي في المسجد ونروح بعد كده لعموحمتو - اسمه كان كده- نشتري بلالين ولعبة للعيد وبعدها نروح لعمو صلاح نأجر عجل ونفضل نلعب فى الشارع لحد الضهر نضحك من قلبنا ونجري نطنطت وبعدها نطلع نريح شويه وننزل تاني لحد ما يجي ميعاد خروجة بالليل الحلوه اووووووووووووى
ياااااااااااه ايام حلوه بجد بجد
دلوقتي ولا في جدتي
ولا في عمو حمتو
ولا في لعب
ولا في عمو صلاح
ولا في عجل
ولا في صحاب
ولا في اي حاجه اصلا من مظاهر العيد
مع الايام بتتغير مظاهر كل حاجه
ههههههههههههههههههههههه
يخرب بيت النكد
ده انا نكدت على البشرية كلها
يا جماعة العيد فرحة كفاية اوى اوى انك تحس ان العيد ده هدية من ربنا على انك اديت رمضان كويس
دي بجد احلى نعمة
صحيح العيد وفرحته اتغيرت عن زمان لان كل مرحلة وليها فرحتها
بس دلوقتي كمان العيد ليه فرحة حلوه اوى بس بمنظور مختلف
يلا اسيبكم مع الكحك والبسكويت علشان تتخنو
وماتنسوووووووووش العيديه لحسن بجد بجد هزعل اووووووووووووووووى لو مااخدتش عيديه
النجمة المأنتكة
لوليتا هانم السُكرة
ومرافقتها البلونه الخضرة
Monday, July 28, 2008
خبر كدة لا ع البال ولا الخاطر
ال ايه !!!!
استعدوا للخبر يا بشريه
لا لا لسه مش اتجوزت فهمتو غلط انتو
ال ايه يا نااااااااااااااااااااااااااس لوليتا نجحت
اه والله زى ما بقولكم كدة بالظبط
كان بقالى فتره مرعوبه وبشد في شعري
بس خلاص انا نجحت يا نااااااااااااااااااااااااااااس
هاتو الشربات واملولي البلوج ده هدايا
انا نجحت وماحدش قدي يا عالم يا هو
اخيرا اصبحت منقوله للفرقه التالته
كان في دماغي اليومين دول بوست مكتئب موووووووووووت علشانكم
بس علشان المناسبة الحوله دي خلاص مافيش كآبة
قد ايه ربنا كريم اوى اوى اوى
فترة الامتحانات اللى فاتت دي كانت حاجه لا تحتمل
كنت متدمرة نفسياً وجسدياً ومعنوياً وكل حاجه تتخيلوها
ولأول مره في حياتي اتخيل اني ممكن ادخل امتحان ومش اعديه وفعلا كانت هتبقى اول مره
بس ربنا ستر وربنا اكرم من اى توقع
صحيح هو انا حاسة ان فرحة نجاح الجامعة مش زي فرحة نجاح المدرسة بس بجد والله عندي راحة نفسية جامده مووووووووووووت
بس فرحة النجاح في اى وقت وفي اى ظرف بجد بجد مالهاش منافس
الواحد بيحس براحة جامده اوى بعد التعب الجامد اوووووووووووووى
والله نسيت كل القرف والتعب اللى كنت فيه
ونسيت حرقة دمي مع الدكاترة اللى كان كلهم عندهم حاجه غلط في دماغهم
يارب ديم عليا فرحتي وعلى كل الناس الفرحانه
على فكرة الشيكولاتة دي بتاعتي انا ماحدش يمد ايده عليهاوماحدش يدخل بأيده فاضيه
وماحدش يدخل من غير مايقول مبروك
انتو فاهمين ولا ابين العين الاحمره
Thursday, April 24, 2008
23 ابريل 2008
اليوم العالمى للكتاب وحقوق الكاتب
عقد معهد سيربنتس بالقاهره - المركز الثقافى الاسبانى-
يوم ثقافى للاحتفال
وكان من ضمن فعاليات هذا اليوم
اعلان نتائج المسابقة التى قامت مكتبة المعهد باقتراحها منذ اكثر من اسبوعان
وكنت قد تقدمت فى هذه المسابقة بكتابة قصة قصيرة باللغة الاسبانيه عن اهمية القراءة
وقد تم تكريمى باهدائى مجموعه قيمة من الكتب الاسبانية
______________
منهم انى كسبت على ناس كتير منهم ناس متخرجه ومنهم ناس دارسة فى المعهد حاجات كتير اكتر منى
وكمان لانى التكريم ده فى اكتر حاجتين بحبهم اللى هم مجال الأدب والكتابة وكمن اللغة اللى تقريبا بقت حياتى كلها دلوقتى
وسبب اكتر كمان ان اللى كرمنى هو السفير الاسبانى
ومدير المعهد
ومديرة المكتبه
يعنى فرحة مالهاش حدود
سلمت على الاسفير يدا بيد زى ما بيقولو
طلعت على الاستاتج وسلمت عليهم وحسيت ان التكريم ده حاجه كبيره اوى
رغم ان المسابقه صغيره الى حد ما
بس لما تبقى فى وسط ناس اجانب كتير وانت اللى بتتكرم
فى ابدا فى لغه جديده
واللى بيكرمك ممثلين البلد دى
السفير ومدير المركز الثقافى
دى بجد حاجه كبيره اوى
كفايه عليا اوى التكريم ده اكتر من الكتب او الاشتراك او كده
كفايه انى وقفت جنبهم وسلمت عليهم وكمان صقفولى وشجعونى
لا وايه السفير قاللى العمر بتاعك رائع
الحمد لله الحمد لله الحمد لله
راجعه بقى ماحدش قدى فى الدنيا دى كلها
سلمت على السفير
Falling hearts Here
