CLICK HERE FOR THOUSANDS OF FREE BLOGGER TEMPLATES »

بيتي الثاني .. برتاح هناك

Tuesday, March 16, 2010

مقدمة لا بد منها او مالهاش لازمة على حسب

من وجهة نظر البعض
فليس لتلك السطور أن تخرج من بين ضفاف مفكرتي الزرقاء
ولكني - أنا الإفتراضية - ترفض كل اشكال القيود
ومنها ذلك النوع الرخيص من القيود الحسية واللتي يسمونها افتراضاً - الأخلاقية - ولكنها حقاً لا تهمني

هزياني اعرف جيداً إنه لا يهم احبداً غيري
واغلب الظن أن ذلك الهزيان ليس شخصي لكنه هزيان أنثي
جزء ما بداخل أنثى ما
ترفض القيود وتصرخ

تصرخ ثقافة ... تحرر ... طموح ... أنوثة ... وقاحة ... جرأة ... أو على اقل تقدير حياة

*****

ما يحدث في القدس ... أمر طبيعي لمخطط معروف ولكننا لم نفكر ابداً بالتقدم لتغيره فلماذا لا نغضب إلا "بعد وقوع البلاء" وقتها فقط يعلو صوتنا
ليس غريباً أن ينظر لنا العالم على اننا "متخلفين"
نعم أغضب ولكن ما فائدة الغضب؟ سلبو صوتي و حريتي ولم يعد لي إلا الصراخ
فكفي صراخاً يصّمني ولا يسمعه غيري
سأخرس واصلي في صمت

*****

في يوم المرأة المصرية اريد أن أقول شيئاً واحداً
لا أقتنع بما يسمونه المساواة
لقد خلقنا الله ليكمل كلانا الأخر
القطب السالب يجذب القطب الموجب
والقطب الموجب يتنافر مع قرينه

*****

مصر ... هم يضحك وهم يبكي
ربنا يخليكي يا مصر

عندما تقترب فكرة الرحيل ... الوطن راحة القلوب لو مبني طوب أو مبني قش

*****

عشقته كاتباً بيده قلم

*****

عندما يختلف معك جميع من حولك فالعيب ليس بك ! ولكن ايضاً ليس بهم !
"ما عيب إلا العيب "
هناك فقط إنسداد في قناة التواصل

*****

بعدما ذقت ... دعوني اسميه " اللذة " عرفت اني اضعت 9 شهور من عمري في هباء
ولأول مرة اعترف اني اخطأت ... نعم
اخطأت في حق نفسي عندما تخيلت - ياله من هراء - انه يمكن لأحد ان يغير المصير
ولا أحد يغير من نفسه أو يتخلى عن خريطة حياته من أجل شخص اخر
بغض النظر عن كينونة ذلك الأخر
هي دي الحياة
كل ميسر لما خلق له

*****

بعض ما يسمونه وقاحة اسميه - أنا - اسلوب حياة

*****

Pleasure ... "Sin"

*****

قال لي : أختاه ... اريد ان ادلك على الطريق القويم
فلتتوبي وتغتسلي و تصلي و تطلبي الغفران

*****

أنا مش كافر لكن شو بعمل إذا ما اجتمعو فيّ كل الأشي الكافرين

*****

قال وهو يحاول أن يحرك قطعة الجليد خلف قفصي الصدري "أحبك"
نظرت له قائلة ..... ربنا يسهلك

*****

Home ... sweet home
افتقده

*****
قليلاً من الحنان يكفيني !

*****

إن اللذة ليست في المتعة نفسها
إنما في محاولة سرقة تلك اللحظة

ومن يختلف معي ..... يحتفظ برأيه لنفسه

*****

بمجرد أن تغلق الأضواء ... تفتح أمامي شاشة السينيما

*****

كنت اقول :
الخيانة تقتل الحب و تشعل نار الذكريات

*****

وياه لما السنين بتعدي وتسرق منا فرحتنا

*****

في النهاية ارى انتحار قلمي

Tuesday, March 2, 2010


Thanks for being in my life :)

Wednesday, February 3, 2010

هو - كما يرى نفسه- :


2- شاب طموح، مع انه يكتفي بالطعام والشراب وخروجتين كل اسبوع

3- انسان متفتح، لا اعلم على وجه اليقين ماذا يعني بذلك الوصف حيث انه لا يرى سوى الأفكار التي تربى عليها والتى زرعتها بداخله "أمه"

4- انسان متواضع، لا اعرف كيف !! تحدثنا مرة ساعة كاملة وكنت احسب الكلام الذي يقوله تحدث عن نفسه بنسبة 75% من المكالمة كان يتحدث عن نفسه واحلامه وافكاره ولم يكن يستمع لي إلا عندما اقاطعة واقل له "ممكن تسمع رأيي وبعدين تحكم عليا "

5- إنسان متدين ملتزم، وهذه بالنسبة له اهم صفاته وافضلها على الإطلاق لا اعرف كيف لإنسان ان يطلق على نفسه لقب ملتزم ومتدين، فالذي اعرفه أن الله هو من يقوم بتصنيف الخلق. وايضاً لا اعرف ماتعنيه لديه كلمة ملتزم او حتى متدين. فكلانا لا يقصر في صلاته و كلانا يؤمن بوجود الله فما الفرق بيننا غير الجوهر ؟؟ وانا على يقين تام بأن كل ما فيه مظهر وليس جوهر

6- إنسان وفي يقدر الإنتماء والإستقرار، كنت اجد في ذلك بعض من الحقيقة لإصراره الشديد على الزواج وبسرعة. لكن بعد فتره قصيرة ذهب بنا الحديث إلى مصر وصدمت بوجود إنسان لا منتمي بذلك الشكل المريب. إن لم ينتمى لبلده التى قضى بها كل حياته كيف له ان ينتمى إلى إنسانة يشعر إنها سكنه ؟؟ لا اقتنع بتلك المعادلة

7- يقدر الحياة الزوجية و حرية المرأة ... يالها من كلمات بلهاء ... يرى ان حرية المرأة تبدأ بإرتدائها للنقاب !!! نعم فهي حرة والحرة مصونة لا تنهشها الأعين

8- شاب مثقف، يقرأ كل يوم عناوين الأخبار ... لطبيعة عمله كمترجم ليس اكثر ولكنه يعتمد في الترجمة على موهبتة في اللغة وليس على ثقافته ... فهذا هراء
1- شاب وسيم ، انا لاارى مفهوم لشاب وسيم غير انه ملزق وسهتان و ... لن اكمل فأمي مازالت تعنفني على استخدام تلك الكلمات .

على الرغم إنه مثقف يرى ان الفتاه لا يجب ان تشغل عقلها الرقيق بهموم ثقافية اجتماعية سياسية وغيرها من الهموم التي لا تزيد الفتاة إلا - كرمشة جلد وجهها و فقدان شعرها لبريقه - وإن كان ولا بد من ان تشغل عقلها بشئ فيكفيها ان تملأه بوصفات الأطباق الشهية التي يعشقها

ذلك الشاب يريد فتاه لها نفس مجال عمله ... ولا تنخدعي بالعنوان ... فهو لا يريد ان يبدأ حياته معها ولكنه وعفواً في اللفظ - يريد ان يبدأ حياته على قفاها- فهو بعد الزواج لن يكن لديه متسع من الوقت كي يعمل في وظيفتين كما هو الحال الآن ومعها يحافظ على كونه مترجم لموقع إخباري على الإنترنت فوظيفة الزوجة هنا لا ان تأخذ مكانه تلك الوظيفة ولكن ان تقوم بالترجمة ويقوم هو بإرسالها بإسمه _حتى لا يعرف الناس اسمها- اصل اسم المرأة عورة

الشاب لا يحبني ... فلا حب قبل الزواج ... فهذا حرام
ولكننا اصدقاء حتى الآن ... فهذا ليس حرام
وهو مع ذلك معجب بي كثيراً ولكن لديه بعض التحفظات

1- لا تعجبه طريقتي في الملابس ... خارجة بعض الشئ
2- لا تعجبه ضحكتي ... فهي مثيرة وملفته للنظر
3- لا يعجبه تفكيري ... فانا دائماً اشغل بالي باشياء ليس للفتيات شأن بها
4- يجب ان اقطع علاقتي بكل اصدقائي الشباب ... كرامته لا تقبل ان اعرف رجال غيره فهو ككل رجل شرقي غيرو
5- يجب ان اتعلم كيف ان اكون مطيعة فالفتاة اجمل ما يميزها هو كلمة "حاضر و نعم"
6- بما انني سأكون زوجته في يوم من الأيام يجب ان يعرف كل شئ عن حياتي ولا يجب ان اسأله عن اي شئ في حياته لانه بطبيعته كتاب مفتوح و يتحدث عن كل شئ في حياته ويحكي لي بدون اسرار غير انه ليس لديه اسرار اصلا
7- يجب ان يكون رقم 1 في حياتي وان اعطيه من الإهتمام اكثر مما اعطيه لوالدتي وصديقاتي ودراستي فهو الأهم والأبقى
8- يجب ان اتعلم الا أناقش فانا كثيرة الأسئلة وهذا يزعجه دوماً
9- هو يريد ان يشعر معي - حتى وإن كان قبل الزواج- انه سي السيد وانه رجل ومطاع وانني أنثى يجيب أن اطيع و يريد ان يشعر انه السلطان و يجب على ان ادخل في حريم السلطان
فلا احد في فتيات العائلة المصونة يعترض عليه او يرفع صوته عليه او يناقشه
كلمة اخيرة ..... استرجل ..... وكلمة اخرى ..... مش هبيع دماغي ولو كان التمن دبله وفستان ابيض
انا كده واللى مش عاجبه يشرب من البحر

Sunday, January 3, 2010


- فاكرة؟؟
- طبعا فاكرة
- فاكر الجو ده ؟؟
- ايوه ايوه
- الجو البرد ده
- قعدة وسط البلد بتاعت زمان
- والهوا الساقع اللى يوم ما بيلمس وشي بيحمر وانت تفتكره م الكسوف ههههههههه
- اه يا حبيبتي فاكره
- ايه ده مكاننا مافيهوش حد قاعد

- ريحة البرفان الفرنساوي اللى كانت بتحطه طنط شاكيناز على طول بتيجي ف بالى كل اما اجي هنا
- ياااااااه انتي لسه فاكراها
- اصلي شوفت امبارح فيلم Moulin Rouge
- ايه ده وانا كمان
- وافتكرتها وافتكرت ضحكتها التحفه دي
- نفسي اعرف ليه انتي دايما ربطاها بالفيلم ده
- انا نفسي مش عارفه
- يمكن الاسم بيفكرك بالروج الاحمر بتاعها؟ هههههههه
- الروج اللى كانت بتيج يتبوسني علشان تثبت لكل البنات انه من باريس اصلي مش بيطلع ف البوس هههههههه
- يمكن يا حبيبي

- كل اما اعدي من هنا نفسي تاخدني للميلفيه بتاع زمان
- اه اللى كنت كل مرة بطلبهولك وماترديش تاكليه ده
- مانا كنت بطلبه علشان انت تاكله يا حبيبي واانا اتفرج عليك انت كنت بتحبه اوي
- بس بحبك انتي اكتر
- يوووووه مااتكسفنيش بقى

- شايف البنت والولد اللى ماشيين هناك دول
- اها البنوته شبهك اوي
- والولد بيبصلها بحنان اوي زيك
- نفس ضحكتك لما كنت بقولك كلام حلو
- يااااااااااه نفس نظرتك اللى مش هتتغير

- ايدك ساقعه اوي
- وقلبي دافي اوي
- طب هاتي ايدك
- اديتلك قلبي مش هبخل عليك بأيدي
- ربنا يخليكي ليا
- ومايحرمنيش منك

تطلب ايه يا فندم ؟

- واحد ميلفيه
- واحد كابتشينو
- واحد اكسبرسو
- سايلزيون
- واحد تارت بندق

- هههههههههه نفس الطلبات مش هتتغير
- بقالي كتير ماشوفتكيش بتضحكي الضحكه دي
- تقصد بقالك كتير ماشوفتنيش
- 30 سنه
- وشهر وتلت ايام
- اخر مره كنا هنا
- وكنا على نفس الترابيزه
- وحشتيني
- تؤ انت مش وحشتني
- بجد؟
- اها علشان كنت معايا كل يوم
- احكيلي عملتي ايه في ال30 سنة اللى فاتو
كل حاجه ممكن تتخيلها الا حاجه واحده-
- ايه هي
- اني انساك
- وانتي على طول في قلبي رغم الولاد والشغل ماكنتش شايف غيرك
- رغم كل حاجه وكل الناس اللى عرفتهم كنت بشوفك جواهم ابني الكبير اسمه على اسمك و البنت سميتها زي ما اتفقنا
- نفسك في ايه ؟
- نفسي ارقص
- طيب ثانية واحده
- هتعمل ايه يا مجنون ؟

ممكن تشغلي اغنية
i wanna grow old with you?

- تسمحيلي بالرقصة دي
- انت اتجننت؟
- طول عمري مجنون بيكي
- بس الناس؟
- خدنا ايه منهم
- بس احنا كبرنا ع الكلام ده
- هتفضلي في نظري ذات ال 20 ربيع وهفضل اقولك

I wanna grow old with you
I wanna die lying in your arms
I wanna grow old with you
I wanna be looking in your eyes
I wanna be there for you
Sharing everything you do
I wanna grow old with you






جيت تاني
وقاعدة على قلوبكم المرة دي :D

جيت وبشكل جديد تماما
نيو لوك ... نيو لوك

استنوني مع العودة القوية :P

بس دعواتكم علشان الامتحانات

Thursday, October 29, 2009

وماذا بعد ؟!؟

هه !!
هو ايه اللى ماذا

بعد أن أتممتي عامك العشرين؟؟
إلا تدرين إنه نقطة تحول ؟؟

تحول !!؟
يعني ايه؟؟
انا بمر بلحظات سودة
وانتي تقولي تحول ؟؟
اتحول من ايه لايه بقى ؟؟

صدقتي
أسوء لحظات حياتك
وماذا بعد ؟؟

هوووووف
عايزة ايه مني ؟؟
اعمل ايه علشان ترتاحي ؟؟
اقوم انتحر وذنبي ف رقبتك ؟؟
بتقلبي عليا المواجع ليه ؟؟


أريدك انتِ
أريد أن تستيقظي من تلك الغفوة
ماذا بكِ يا فتاة ؟؟
ماذا حدث؟؟

أنا !!
هو ايه اللي حصل !!
مانا زي الفل اهو !!
انتي اللى بتهولي كل حاجه
بتعملي من الحبة قبة

عزيزتي
ارجوكِ الهدوء
هل تمانعين لو طلبت منك ان تجلسي هناك
على ذلك الشاذلونج
إنه مريح جداً
سيساعدك على تملك اعصابك

انتي فكراني مجنونة ؟!!؟؟؟

عفواً حبيبتي
أنتِ فقط تحتاجين الى بعض الصبر
وانا اريد مناقشة بعض الأشياء معكِ
اجلسي من فضلك

الله اما طولك يا روح
حاضر اديني قعدت

اعلم انكِ من عشاق الموسيقى الكلاسيكية
سأضع لكي مقطوعة تحبينها كثيراً

صبرني يارب
انتي عايزة مني ايه ؟؟
طب واخرة اللى بتعمليه ده ايه ؟؟
وليه انتي مهتمه بيا كده ؟؟

حبيبتي انا نصفكِ الأخر
واتعذب كثيراً لما وصلتي إليه
ولا يرضيني ان اراكِ على هذة الحال
أنتِ اللتي كانت ضحكتها تجعل ما حولها فردوس
وإبتسامتها تضئ الكون
وتحيل الليل نهار

:(
بتقلبي عليا المواجع

ليست مواجع يا حبيبتي
وبإمكاننا التغلب عليها
فقط اثبتي
واستمدي قواكِ من الله
إنه خالقك وعالم حالك

يااااااااااااااااااارب
إلهي انت تعلم كيف حالي
فهل يا سيدي فرج قريب ؟!!؟؟؟

نعم يا حبيبتي ان الفرج قادم لا محال
قال ربكِ جل فى علاة
قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ


مابكِ لا تطيقين صبراً
لست اول من تعرض لما تتعرضين له

خلاص تعبت
تعبت اوي
كل حاجه ضاغطة عليا
ضغط في البيت مايتوصفش
و ضغط فى المذاكرة
وتأنيب ضمير لأني حاسه اني بعمل حاجات غلط
و ضغط من الوقت بيضغط عليا وبيضغطني في حاجات كتير
و و و و و و و
تعبت

حبيبتي تذكري قول الله لكِ
وَلاَ تَيْأَسُواْ مِن رَّوْحِ اللَّهِ إِنَّهُ لاَ يَيْأَسُ مِن رَّوْحِ اللَّهِ إِلاَّ الْقَوْمُ الْكَافِرُونَ

يا الله يا ولي الصابرين
بس انا فعلا مخنوقة
ومش عارفه اعمل ايه علشان اعصابي تهدي

حبيبتي
هلم فتوضئِ و أقيمِ الليل
وكل عام وانتي إلى الله اقرب
اليوم هو بداية عام جديد
ابدأية بحبك لنفسك
و حبك لربك
تغلب على ما فاتك
الحياة لا تحلو بدون صعاب


عندك حق
كل سنة وأنا طيبة
كل سنة وأنا قوية
كل سنة وانا ناجحة
كل سنة وانا متطمنة
كل سنة وانا قلبي منور
كل سنة وانا الدنيا حواليا
كل لحظة وانا راضية ربي
كل سنة وأنا ... أنا

مازلت هناك في بيتي الأخر
ولكن هذا البيت الشاهد على الكثير والكثير لا اريد ان اتركه خراب في مثل هذا اليوم
انه يوم مولدي

Monday, October 26, 2009

انا غيرت خلاص عنواني
******

سأجمع اشيائي وارحل قليلاً
******

سأذهب إلى بيتي الثاني
******

أشعر انني في حاجة ماسة إلية

وعلى كل حال
سوف اترك لكم عنواني الأخر

إنه ليس غريب

هو دفتر مذكراتي


ابقو زروني
هناك اريحلي اليومين دول
هستناكم


Sunday, September 20, 2009





حبايبي الحلوين

وحشتوني
كل سنه وانتم طيبين
بما اني مش لاقيه حاجه اكتبها
فانا جايه افضفض شويه
يمكن ماحدش يفهم اللى انا بقوله
ماتقلقوش المشكله مش فيكم
ده فيا انا

**********


ويااااااااااااااااه
لما الحنين بياخدنا

لمرجيحة بتحضنا

وياااااااااااااااااه

وبتعلى فوق صور بيتنا

تاخدنا لفوق وبتسعنا

نلاقى الطفل جوانا

عنيه بالفرحة مليانة

وضحكة مش مفرقانة

فى بشرة خير لأيامنا

ويااااااااااااااه

لما الحنين بياخدنا

لمرجيحة بتحضنا

ياريت ترجع ليالينا

تاخد تانى ايادينا

تجمعنا تخلينا

نشوف من تانى قدامنا


وياااااااااااااه

لما الحنين بياخدنا

لمرجيحه بتحضنا

وياااااااااااااه

وبتحلى بيها دنيتنا

تاخدنا لفوق وبتسعنا

تلملمنا صديق وصديق

ترجع حلم قلب برئ

تقول غنوة تبل الريق

وترجع بيها احلامنا


وأااااااااااااااااااه

لما السنين بتعدى

وتسرق منا أحلامنا

وااااااااااااااااااه

دى بتجرى ما تهدى

تضيع ملامحنا وكلامنا

**********
نص بيضحك و التانى زعلان
انا شيخ فلتان
طيب شرير و جرئ و جبان
اوقات مشرق و اوقات بهتان
و ساعات سلم و ساعات تعبان
مفترى جداً و كمان غلبان
شبابيك و بيبان .... توهة عنوان
انا م الأخر عفريت لابس بدلة إنسان

************



جمر الهوا جوا القلوب والع ... والع
لو غاب قمر مليون قمر طالع ... طالع
يا عشاق الحياة
يا ضحكة من منني العيون متمكنه
كل المطارح ملكنا

م القلب ده دقة
والحس ده حبة
والرجل دي دبة

***********



نفسي اغمض عيني وافتحها الاقينا بقينا فى الشتا والمطر بيمطر
انزل اتمشى ع الكورنيش
ايدي في ايد اجدي جينتل مان فى البلد
ناكل ايس كريم ونشرب حمص شام
نتفسح لحد الفجر

Monday, July 20, 2009

جيت 

وعارفه ان الكل زعلان مني

وماكنتش ناويه اجي اصلا

بس قلت افرحكم معايا

انا نجحت الحمد لله 

وبقيت فى سنه رابعه 

فاضلي سنه واحده بس واتخرج

وقدامي حاجات كتير جدا لازم اعملها فى السنه دي 

عايزاكم كلكم تدعولي

بجد مش عارفه اشكر ربنا ازاي

مهما قولت الحمد لله وشكرته مش هيبقى زي ما ربنا وقف جنبي خالص

انا بحبك اوي يا رب 

اللهم لك الحمد كما ينبغي لجلال وجهك وعظيم سلطانك 

السنه دي بجد اول مره افرح بنتيجه ليا كده بعد الثانوية العامة 

مع انها مش احلى النتايج ولا حاجه 

بالعكس كمان ممكن تكون اقلهم 

بس فعلا السنه دي كنت فاقده الامل نهائي 

ولأول مره فى حياتي جالي احساس اني ممكن مااعديش منها على خير

بس الحمد لله ربنا كريم اوووووووي اوووووووووي اوووووووووي 

_______________

حاجه بقى بره الموضوع كده

بس لازم اكتبها هنا ودلوقتي 

حاجه مكتوبه لحد هو عارف نفسه كويس اوي

بجد فرحتي كانت هتبقى اكتر بكتير لو لقيت منك ريأكشن غير ده

مش عارفه ليه العلاقة بينا وصلت لكده 

نفسي اعرف انا غلطت فى ايه 

او انا اتغيرت فى ايه 

بجد اللى حصل النهارده ده ضيع عليا فرحتي وكل اللى حواليا لاحظو ده  

وبردو مش فاهمه السبب

ليييييييه كبيره اوي بتدور جوايا ومحتاجه اعرفلها اجابه 

وكل الاجابات فعلا مش مقنعه 

ومش هتدي اكتير من 50% من الراحة المطلوبة 

بجد فعلا زعلانه اوي

وفعلا ضيعت فرحتي  

Thursday, April 2, 2009



"مصطفى"

مصطفى شاب 

زي اي شاب

مواليد 9 يوليو 1987 

فلسطيني 

بس كان عايش في مصر

حياته كانت زي حياة اي لاجئ فلسطيني 

جواه جرح كبير

بس كان ديماً بيثبتلنا انه اكبر من الجرح ده

عيلته تقريبا كلها كانت بعيده عنه

كل واحد في بلد

شاف كتير اوي

حياته كانت مليانه بالألم لحد كبير

ولكنه عمره ما فقد الأمل

من سنتين مصطفى اصيب بنوع من انواع السرطان

نوع مش مشهور اوي

بيصيب الغدد الليمفاوية على قد ما فهمت

المهم

مصطفى في الفترة دي كان قريب اوي من ربنا

بجد ما شاء الله عليه

على قد الألم اللى كان بيشوفه على قد ماهو كان صابر وراضي

كان كل اما اكلمه يقولي :

يابنتي ده قدر ربنا

هو انا هعترض على حكمه

وده تكفير ذنوب يمكن ربنا يغفرلي

بجد انسان رائع بكل معنى الكلمة

 اخر الصدمات اللى شافها مصطفى كانت في الاحداث بتاعت غزة اللى فاتت

استشهاد عمته وزوجها واطفالها كلهم

بجد اتقبل الموقف بشجاعه ماتتوصفش

وكان كل اما يتكلم يقول هم راحو عند رب كريم

احنا اللى لسه بنتعذب

يا بختهم ماتو شهداء

ياريتني مكانهم

........

واهو بقى مكانهم

مصطفى اتوفي امبارح 

واللى اعرفه ان مريض السرطان لو اتوفى بيه بيكون شهيد 

واحسبه عند الله شهيد

.............

مش قادره اقول اكتر من كده 

غير ربنا يرحمه 

واحتسبه عند الله في الفردوس الأعلى 

ادعوله يا جماعه 

مصطفى يستاهل كل خير 

 _____________

اصعب بوست كتبته من بدايه اما عرفت عالم التدوين

كان بيحب يدخل مدونتي :(

ربنا يرحمك يا مصطفى :(

ربنا يصبر اهلك 

ويصبرني 

وتكون في الجنه ونعيمها 

يااااااااااااااااااااااااااااااااااااااااااااارب 

Monday, March 30, 2009


دعنا في البداية نتفق

هذا الحديث من وحي خيالي

وتلك الرسائل هي محض خيالات فراشة 

كثيراً ما يقولون عنها انها مصابة بمس من جنون 

******

دعنا نتفق ايضاً انني سوف اصفك بالصديق في ثنايا حديثي

وهذا حتماً لا يحدد نوع العلاقة بيننا 

ولكنه منعاً للإلتباس 

******

حسناً دعني اضع بين يديك بعضاً من قصاصاتي 

غير ذات القيمة 

والتي ارغب في مشاركتك اياها

***

طالما اعترف بأنك صديقي ... فلابد ان احدثك بصدق عما يدور بداخلي 

*****

فكان اقصى احلامي أن اغفو على صوتك 

وبعد أن حققت لي تلك الأمنية ... صار الآن 

الآن ما اطمح اليه ... لا دعك منه

كل ما ارغب في قوله 

هو شكراً 

لأنك حققت لي أمنية 

*****

اتعرف انني احياناً ما اشعر انك تروي لي اشياء تدوخني

واحياناً اخري اجدك ترمي لي بكلمات كالحجارة

تجعلني اشعر انني اسقط من ناطحة سحاب 

ولكن صبري عليك يفوق الحدود

*****

اتعرف انني اغبط نفسي انني تعرفت عليك 

واشفق عليها في ذات الوقت لذات السبب

أليس هذا مس من جنون ؟؟

فأنا أسعد وأشقى مخلوقة في العالم

أسعدهم لأنني معك

وأتعسهم لأنني معك

*****

 اتعرف انني عندما استمع إلى صوتك

اشعر بأن الحياة تدب مرة اخري في جسدي

الذي أسقمه  واعياه عقلي الذي لا يكف لحظة عن التفكير

*****

هل لي أن اطلب إليك ان تعطني وردة ؟؟

*****

اعرف ان كلامي قد يسبب لك بعض الضيق

ولكنك طلبت أن تعرفه 

اشكرك على كل شئ

اشكرك على وجودك في حياتي

واستمحيك عذراً ان كان كلامي سيضغط على وتر حساس

ولكني اريدك ان تعرف انني غير غاضبة

وانني سعيدة جدا معك 

وانني لن اكرهك يوماً

ولن اتركك يوماً

ولن اجرحك يوماً

والسلام ختام :)

Thursday, March 5, 2009




مدلعاكم اخر دلع 

تلت بوستات في تلت ايام 

والبوست ده مليان جاتوه وتورتة وحاجة ساقعة

مش مخليه نفسكم في حاجه

بس قبل اما تمدو ايدكم على حاجه 

اللى مش هيقول مبرووووووووووووووك من قلبه ويجيب هديه حلوه ياخد الماوس بتاعه ويمشي من هنا 

بسم الله الرحمن الرحيم 

قال ايه 

انا نجحت هههههههههههه

اه والله مش كذبة ابريل 

شوفتو بقى 

بعد عذاب الامتحانات اللى يقهر الجبل 

الحمد لله ربنا عوضني 

وعوضني بتقدير ماكنتش احلم بيه اصلا السنه دي 

يااما انت كريم يارب

قد ايه انت كريم اوي اوي اوي

اللهم لك الحمد كما ينبغي لجلال وجهك وعظيم سلطانك 

لا اله الا انت سبحانك اني كنت من الظالمين 

يلا اسيبكم مع الجاتوه والتورته والحاجه الساقعه 

واياكم تنسو الهدايا 

هخسركم 

هههههههههه

كان معكم لوليتا هانم الفرحانه اوي 

" تاتش وود "

ربنا يديم عليا فرحتي و

يفرحكم كلكم 

وكل حد فيكم مستنى لنتيجه تطلعله بأحسن ماهو منتظرها 

Wednesday, March 4, 2009

مش انا طبعاً 

شوفتو انا جيت بسرعة ازاي 

اي خدمه 

بوستين ورا بعض اهو 

مين بقى اللى عمل اللى عليه 

هو او هي !!!

مش الغاز 

دول حلقتين للشيخ مصطفى حسني ضمن برنامج خدعوك فقالو

بيتكلم ببساطة عن ازاي كل راجل يخلي زوجته اسعد انسانه في الدنيا

وازاي كل زوجة تخلي زوجها اسعد انسان في الدنيا

افكار بسيطه اوي

طالعه من دينا

ومن فطرتنا

الحلقتين عجبوني اوي قولت اجيبهم لكم علشان لو حد ماشفهمش

وفي نفس الوقت عايزه اتكلم عن الموضوع ده 

الحلقه الاولى 

الحوار للرجال 

Mp3
http://rapidshare.com/files/200801728/Khadaouk09EP8.mp3

Video
http://rapidshare.com/files/20080172...aouk09EP8.rmvb

الحلقة التانيه 

الحوار للنساء 

Audio:

http://rapidshare.com/files/203338216/Ana_3amlt_elly_3alia_p2_ah.mp3

video:

http://rapidshare.com/files/203346685/Ana_3amlt_elly_3alia_p2_vh.rm

انا بقى عن نفسي شايفه ان الموضوع كله بيتوقف عند البنت الزوجه المفروض هي اللى تاخد على عاتقها حمل انها تلطف الجو

بجد شايفه ان المفروض هي اللى بأديها تسعد البيت كله او هي اللى تنكد على البيت كله 

وانا بسمع الحلقة بتاعت الزوجات 

قلت فعلا هو ده الصح

حتى لو الزوج ماعندهوش دم المفروض احنا - الجنس الناعم - اللى فى ايدينا كل حاجه

احنا اللى نقدر ننكد واحنا اللى نقدر نسعد

يمكن ناس كتير تيجي تضربني وتقولي انتي بتتكلمي بوجه نظر اللى مش عاش في الدنيا دي

وماتعرفيش ايه اللى بيحصل علشان تتكلمي

يمكن

بس الاكيد ان ربنا اللى خلقني وخلقكم لما يكون هو الأساس بعلاقتنا بالطرف التاني كل اللى انا بقوله ممكن يتحقق

لاني ببساطه كل اما اجي اتعامل مع الطرف ده هفتكر اني بعامل ربنا مش بعامله هو 

اما بقى اذا كان طرف من الاتنين بيراعي ربنا والتاني متمادي في الغباء 

يبقى بردو العيب مش في وجهة نظري

العيب انه في البداية ومن الأول مامشيوش على قواعد ربناه

ولا هو ظفر بذات الدين

ولا هي اختارت اللى يرضى ربنا عن دينه وخلقة

كان سوء اختيار من الأول

بس انا خلصت كلامي

وياريت اسمع تعليقاتكم على الحلقتين  

Monday, March 2, 2009

ازيكم الاول

وحشتوني 

بجيلكم كل سنه مره هههههه 

بس معلش بجد كنت مشغوله شويه 

قبل اما ابتدي عايزه كل حد فيكم يدعيلي اللى بعمله دلوقتي يخلص على خير ان شاء الله 

واوعدكم لو حصل هعزمكم نفر نفر على لبن تشيكلس وبونبوني اكلير ابو 10 صاغ ده هههههههه

عايزه افضفض شوية علشان الموضوع ده عاملي نفسية وحشه كده جوه نفسيتي بقاله فتره 

رغم ان عمري ما اهتميت بيه اصلا 

بس لقيت الكلام فيه بقى بيتكرر ليل ونهار من كل اللى حواليا 

الموضوع ببساطه بيتلخص في ان معظم البشر اللى حواليا بتقول عليا اني برقص ع السلالم 

لا اللى فوق يشوفوني ولا اللى تحت يسمعوني

بمعنى تاني اكثر وضوحاً 

الناس المتدينه جدا شايفه اني مش ملتزمه نهائياً وشايفين اني بعمل كل حاجه غلط 

مش عارفه مين اللى بيصورلهم التصور المهبب ده 

والناس المنحرفه اخلاقياً 

او مش منحرفه 

بس اللى مش ملتزمه شايفاني محبكاها اوي !!!

وللاسف دول ودول هم كل صحابي 

او المفروض انهم صحابي 

بس انا عايزه اعرف 

مين اللى يدي الحق لبشر زيي زيه انه يحكم عليا انا ايه ولا بعمل ايه ولا ليه ؟!؟

مين اللى يديهم الحق انهم يفسرو تصرفاتي 

مين اللى يديهم الحق انهم يحللو شخصيات اللى قدامهم بمنتهى الأنانيه شايفين نفسهم هم بس اللى صح؟!؟

يعني ايه لما اكون بخرج مع صحباتي وبنضحك من قلبنا وبسمع اغاني وبلبس هدوم ملونه الاصفر منها والاحمر 

اكون منحرفه !!!!!!!!!

ويعني ايه لما اكون كل يوم الصبح وانا في طريقي للجامعه بسمع او بقرأ جزء من القرآن او مش بقعد مع زمايلنا الشباب في الكافيتريا او مش بسلم على راجل غريب ايد في ايد 

اكون متشدده !!!!!!!!!!

مين دول ومين دول علشان يحكمو عليا 

طبعا انا شايفه الناس اللى اقرب لربنا مني في مكانة اعلى مني 

وبغبطهم عليها

وبتمنى من ربنا كل يوم في صلاتي اني ابقى قريبه منه 

وكمان شايفه الناس اللى اقل مني في علاقتي بربنا اني سبقتهم بخطوه 

وهم في يوم من الايام هيوصلولها 

وبتمنى من قلبي وكمان بدعيلهم بكده 

بس ليه ماحدش فيهم مستوعب حاجه زي دي 

!!!!!!!

انا اللى غلط ؟

ولا كل الناس ؟

ولا ايه بالظبط 

خلاص بقى انا رغيت كتير 

بس وصلت الفكره اللى كنت عايزه اقولها 

كان معكم الست لوليتا هانم القرفانه من قدام الكي بورد 

تشاو يا خلق

 

Saturday, February 7, 2009


زعلانه منكم نفر نفر 

اه بجد

طلعتم وحشين اوي 

وهانت عليكم العشرة 

وهان عليكم البونبوني اللى اديتهولكم 

ماكانش عيش ولحمة وكحك 

زعلانه اوي بجد بجد منكم كلكم

بس كعادة سيادتي ديما 

وعادة قلبي اللى ابيض من الرز بلبن 

قلت خليني انا الطيبه 

ووقلت اجي اسلم

واقعد على قلبكم تاني زي الاول

عارفه انكم زعلانين مني علشان مش كنت بسأل على حد ولا بلوجر ولا ماسنجر 

بس بردو مش مبرر يا اشرار علشان تقعدو تلت شهور ماتعبرونيش 

مش تسألو يمكن اكون انتحرت على اثر الامتحانات اللى مالهاش وصف اللى كنا بنمتحنها دي 

يلا ما علينا خليني انسى

انا جايه اسلم

واقول وحشتوني

وافتح صفحة جديده بعد حالة اللغبطه اللي كنت فيها دي

يوووووووووووووووووووه نسيت اقول 

حاجات كتير ماتتحكيش هههههه

 

سلام يا شعب 

كان معكم محدثتكم البونبوناية المسكرة 

الست لوليتا المقموصه :p

تحديث :

من كام يوم قريت على الفيس بوك عند احمد الصباغ خبر وفاة الفارس الملثم :(

بجد كان الخبر زي القشة التي قسمت ظهر البعير 

يمكن انا مش اعرفه شخصياً بس كتير كنت بتابع مدونته وبحس بكلام منها بيلمسني 

فياريت كلنا مش ننساه لانه كان واحد من عائله بلوجر اللى اتشرفت اوي اني واحده منها

وياريت كلنا في كل صلاة ندعيله 

ربنا يرحمه ويغفرله ويحسن ليه 

Sunday, December 7, 2008

يااااااااااه
فين اخر مره شفت فيها الصفحه دي
ههههههههه
بجد وحشني موووووووووووووت
كلكم كلكم كلكم

هابي عيد عليكم
هابي لحمه :P
فرصه الواحد يشوف اللحمه اللى بقاله دهر ماشمش ريحتها


اعذروني بجد اني مش بدخل
بس حاسه اني بمقت الكمبيوتر ههههههههه اه والله
هو صحيح انا طول عمري بكره التكنولوجي الحديثه
بس اليويمن دول بزياده

مش بفتح الكمبيوتر
اصلا ده اختراع فاشل
كل اما افتحه الاقي اخبار منيله
يووووه

ما علينا مش وقته الرغي ده كله

انا داخله علشان اقولكم هابي عيد يا خلق الله
واقولكم كمان هعمل ايه في العيد
زي ما اصدقاء الفيس بوك شايفين
3id = a7la re7la le coton island 7 days wzout mobils, silly people, za7met mwaslat CHEEEEEEEER
هو ده العيد بتاعي انا هنااااااااااااااااااااام
وهخلص المذاكره الله يحرقها اللى مش بتخلص دي

واهم حاجه في العيد
اني هقعد اسبوع كااااااااااامل مااركبش مواصلات
ياااااااااه
مش مصدقه نفسي

هو صحيح انا طول عمري بستغرب اننا نقول على حد ابن ناس
لان الباقيين مش ولاد هوهو يعني


بس فعلا فى المواصلات كل يوم بصوت واقول انا بنت نااااااااااااااااااااااااس


والله انا بنت ناس
مش معنى ان الظروف حكمت عليا اني اركب المواصلات العامه
واسبيشال الموصلات من والى امبابه ستي
فالناس تلاقي مبرر انها تعاملني بحقارة


لا اعتررررررررررررررض

والله عندي عربيه

وبعرف اسوق
بس انا بكره الزحمه او بمعني اصح بخاف
اه والله بخاف من الصوت العالي
وبخاف من الزحمه


فليه الناس بتخليني اكره نفسي بقى علشان بركب مواصلات عامه

ما علينا
المهم اني اسبوع بحاله هرتاح من الزحمه
وهرتاح من اني لما ارجع بيتنا كل يوم اقعد اعيط بسبب الزحمه وبسبب ريحة الناس الوحشه وبسبب الاغاني اللى فى الميكروباص وبسبب التوك توك وبسبب الشباب اللى عايزين الحرق

اسبوع كامل همارس فيه حريتي وكرامتي كفتاة




اكيد دلوقتي ببتقولو البت دي اتهبلت
بس اللى منكم ساكن في امبابه وبيروح جامعه عين شمس هيعرف اللى انا بقوله
وهيعرف اني بجد بجد مش بهول الموضوع

بس خلاص همشي انا بقى علشان جعانه وماما مش راضيه تأكلني من لحمة العيد

سي يو اول فيري سووووووووووون


محدثتكم من امام طبق الفته
البونبوناية المسكره
الست لوليتا

















صحيح
الشريط الجديد بتاع رامي صبري فيه اغنية تحفه اوي اسمها
ده اللى بستناه
برايفت اهداء مني ل ......





ليكم كلكم ههههههههه
مش تفهمو غلط :P
اللى بيحب يهديها للي بيحبه
واللى مش بيحي يسمعها ويقعد يتحسر على حاله هههههههههههههه
امشي انا بقى لحسن ابتديت اخرف

في رعاية الله

Thursday, November 20, 2008



ازييييييييييكم يا بشر

وحشتووووووووووني بجد

اولا بعتذر جدا عن فترة الغياب الطويله اوى دي
بس بجد انا بقالى كتيييييييير تعبانه اوى اوى اوى ومش قادره اعمل حاجه في حاجه

المهم بلاش رغي كتير

عايزه اقولكم كلكم بجد وحشتوني اوى
واحيانا كده كل فين وفين كنت بدخل على المدونه بتفرج على الكاونتر وبفرح ان لسه كتير منكم بيدخل المدونه يتفرج عليها رغم انه واثق اني ماكتبتش عليها حاجه


وعايزه اقولكم اني فرحانه اوى اوى اوى
لاسباب كتير اوى
منها ان النهارده فرح واحده من انتيماتي علو صوتكم وانتو بتقولولي عقبالك ههههههههه
ومنها اني قلبي خلاص اتطمن على اخري من انتيماتي
واهمها اني حاسه اني قربت اوى من ربنا الفتره اللى فاتت دي

وعلى الرغم من كده ان في حاجات كتير اوى مزعلاني
منها اني بقيت فاشله ومش بذاكر هههههه
بس عادي ولا بقت فارقه اصلا

يلا نسيبنا من الرغي علشان بجد مستعجله
بس عايزه اجاوب على التاج بتاع استاذ
mohamed ghalia
بجد التاج عجبني خالص خالص خالص
وعايزه ارد عليه

وبعتذر لكل الناس التانيه اللى كانو باعتنلي تاجات ومش رديت عليها واولهم حسن حنفي علشان كان باعتلي حاجات كتير
بس الفايل اللى كنت مسجله فيه كل التاجات دي اختفي من الكمبيوتر
فسو بقى
اللى منكم عايزني احل واحد تاني يبعتهولي تاني

بسرعه بقى

السؤال الأول:ماهى السعادة من وجهة نظرك؟
احم احم

السعادة من وجهة نظري .....
حاجة بسيطه اوى
احط راسي بالليل على المخده وانا مرتاحه ومااكونش بعيط او متضايقه او ظالمه حد

وعامة يعني السعادة بالنسبالي اي حاجة بسيطه بتحسسني اني متصالحة مع نفسي و راضية ربي

السؤال الثانى: كيف تصل إلى السعادة؟

ازاااااي ...
تيررارارارا
ممكن بأني مش اضايق حد من الناس اللى حواليا فطبيعي اني هكون مرتاحه وسعيدة
وكمان اني مش اقصر في حق ربي عليا
ساعتها بس بكون اسعد انسانه مهما كانت الظروف

السؤال الثالث: هل السعادة وهم أم أنها حلم صعب؟
تؤ تؤ بالعكس خاااااااااااالص
السعادة دي اسهل شئ في الوجود
ولا هي وهم ولا هي حلم ولا هي صعبة
بس السعادة حاجه نسبيه
ومش بتيجي من فراغ
لازم احنا اللى نخلقها مش نستني لما هي تيجي

السؤال الرابع: هل السعادة طريق للنجاح ؟وضح؟
شووووووووووووور
لان مجرد اما تبقى سعيد هيبقى عندك الباور اللازم لتحقيق النجاح
ماهي زي ما بيقولو هي دي الادرينالين بتاع النجاح

السؤال الخامس: ماهى أكثر اللحظات التى شعرت فيها بالسعادة؟

كتييييييييييييير اووووووووووووى بجد مش هقدر افتكرها كلها
بس اقربها كان امبارح
وانا مع صاحبتي بجيبلها فستان الفرح
ومن يومين لما شوفت انتمتي بعد حوالى 5 شهور ماشفتهاش
ويوم نتيجة الثانوية العامة وخصوصا نتيجة تالته
وايام كتير اوى بجد مش هقدر قولها كلها

السؤال السادس:هل ممكن أن تحقق كل شىء؟

اكيد لا
بس ممكن ارضى بأن اللى حققته ده هو اكتر حاجه مناسبه ليا هتسببلي السعادة
يمكن بالطريقه دي هكون راضيه عن نفسي وسعيده

السؤال السابع: السعادة تجعلك تقبل على الحياة أم لا؟

اكيد يعني هو انا ايه اللى هيخليني اعيش الحياة لو انا كئيبه ومتضايقه

السؤال الثامن: هل أحسست يوما انك وصلت لقمة السعادة؟

اغلب ايام حياتي بحس فيها بالاحساس ده

السؤال التاسع: لماذا تمر أوقات السعادة بسعة؟

هي اولا مش بتمر بسعه خالص
لانها يتخلص بسرعه اووووووي
بس احنا ممكن نوهم نفسنا انها كتير

السؤال العاشر: هل ترى السعادة فى التدين؟
طبعا جدا شور اوي يعني وكل وسائل التوكيد ههههههه
اي سعادة بعيد عن طريق ربنا بجد يعني هي مجرد وهم كبييييييييير اوي بنعيش نفسنا فيه
بس اللى يفهم

السؤال الحادى عشر: هل أنت متفاؤل وعندك أمل؟ وضح؟
تقريبا انا اكتر حد في الدنيا دي متفائل بططريقه بتخلي كل الناس تقول عليا مجنونه
بس فعلا مافيش احلى من التفاؤؤل
يعني انا بعد كل حاجه بتحصلي
واثقه ومتأكده ان ربنا هيخليني اسعد انسانه في الدنيا وشايلي الاحلى دايماً
-وهيرزقني بان الحلال- ههههههه
وموقنه دايماً ان اللى جاي احلى

السؤال الثانى عشر: إذا شعرت بالحزن ماذا تفعل؟
اقوم الاول كده اصليلي ركعتين لله اهدي خالص
وبعدين ادور على سبب الحزن ده
لو لقيته سبب جامد احاول احله
ولو سبب عبيط او من غير سبب اقف قدام المرايا واقولي اتهدي مافيش حاجه تستاهل زعلك يا جميل انت هههههه

السؤال الثالث عشر: هل يستمر معك الحزن فترة ام ينقضى فى الحال؟
بمنتهي الصراحه
3 دقايق و بس

السؤال الرابع عشر: ما رأيك فى الأفراد المتشائمين؟
ناس بيضيعو عمرهم بلا سبب
وبجد بجد هيندمو
وربنا يهديهم



واخر كلامي ان الحمد لله على نعمة السعادة
ميرسي لي اوي يا استاذ محمد على التاج الحلو ده
وياريت اي حد اي حد يدخل البلوج ياخد التاج ويمشي
هتوحشوني اووووووووووووي بجد وبحبكم كلكم في الله
















كان معكم الست لوليتا هانم البونبوناية المسكرة
رئيسة حزب السعادة الابدية
من تحت حطام الكتب هههههه

اشوفكم على خير

Saturday, October 4, 2008


عيناه تمطر احاديث الهوى
تفوح بأعذب الكلمات
تضنو بها شفتاه
يراوغ حتى لا تفضحه عيونه
يهرب مني
يختبئ خلف ستار جليدي من الوقار
يشعل تبغه لتحجبني ألسنة الدخان عن النظر لعيناه
يخالجني شعور بأني اللاشئ
ينظر إلي من اسفل نظارته الزجاجية واهماً انها تخفي عني ما يجيش به صدره









حاجة كدة قبل ااما اختفي تحت اطلال الكتب :)

Wednesday, October 1, 2008



اولا حظكم حلو جدا لاني كل اما اجي انزل البوست الكئيب اللى قولتلكم عليه يجي مناسبة ومش انزله
بس وراكم وراكم والزمن طووووووووووووووووووويل


صحيت الصبح بدري بعد الفجر
اخدت شاور ولبست لبس العيد
وبعدها نزلت صليت العيد
وسلمت على الجيران والاصدقاء والناس اللى مااعرفهومش كمان
- طلعت مشهورة وانا مااعرفش-
ناس كتيره عماله تسلم عليا وانا عامله عبيطه
وبابتي جابلي امبارح بلونه اخضره كبيره
قعدت بعد الصلاة انفخ فيها لحد اما نفسي اتقطع
شكله بيعذبني الراجل ده
صحيح عامل فيها مش واخد باله ومش اداني العيدية بس هروح اتخانق معاه كمان شويه
ووقفت فى البكونه اتفرج على الاطفال وهم لابسين اللبس الجديد صحيح كلهم لابسين الاوان مالهاش اى علاقه ببعض
وصحيح ان نصهم لابسين صيفي ونصهم لابس شتوي
بس شكلهم حلوملامحهم بتقول العيد فرحة
الحاجه الوحشه بقى اللى في العيد اني مش عارفه اركب عجل هههههه
اه والله من السنه اللى فاتت ماركبتش عجله
يلا ماعلينا

بجد انا زعلانه جدا ان رمضان خلص
خلص بسرعه اوى اوى
لسه بدري اوي يا شهر الصيام
الله اعلم ان كنا هنشوفك تاني ولا لأ
بس بجد رمضان ده استفادت منه كتير كتير
اقدر اقول عليه احلي رمضان في حياتي اللى فاتت
اتغيرت اوووووووووى من جوه
حاسه اني اتنقيت وودديت قلبي لللوندري ههههه
اه بجد والله
وياااااااااااااريت كلكم كلكم تدعولي ان الدعوتين اللى بدعيهم من اول رمضان ساعة الفطار وف التارويح وقيام الليل والتهجد يتحققو بسرعه اووووووووووووووووووووووووووووووووووووووووووووووووووووووووووووووووووووووووووووووووووووى بعد العيد

وعلى الرغم انس فعلا مش حاسة بفرحة العيد
بس فرحانه لاني قررت مااخرجش من باب الشقة فى العيد علشان الزحمة


زعلانه علشان مش ده العيد بتاع زمان

لما كنا بننزل بعد الفجر نروح عند جدتي او بابتي ومامتي يسيبوني عندها من بالليل واصحي جري البس لبس العيد وننزل انا وكل الجيران اصحابي نصلي العيد فى المسجد وناخد العيدية من كل البشر اللى بتصلي في المسجد ونروح بعد كده لعموحمتو - اسمه كان كده- نشتري بلالين ولعبة للعيد وبعدها نروح لعمو صلاح نأجر عجل ونفضل نلعب فى الشارع لحد الضهر نضحك من قلبنا ونجري نطنطت وبعدها نطلع نريح شويه وننزل تاني لحد ما يجي ميعاد خروجة بالليل الحلوه اووووووووووووى

ياااااااااااه ايام حلوه بجد بجد
دلوقتي ولا في جدتي
ولا في عمو حمتو
ولا في لعب
ولا في عمو صلاح
ولا في عجل
ولا في صحاب
ولا في اي حاجه اصلا من مظاهر العيد

مع الايام بتتغير مظاهر كل حاجه


ههههههههههههههههههههههه
يخرب بيت النكد
ده انا نكدت على البشرية كلها
يا جماعة العيد فرحة كفاية اوى اوى انك تحس ان العيد ده هدية من ربنا على انك اديت رمضان كويس
دي بجد احلى نعمة
صحيح العيد وفرحته اتغيرت عن زمان لان كل مرحلة وليها فرحتها
بس دلوقتي كمان العيد ليه فرحة حلوه اوى بس بمنظور مختلف

يلا اسيبكم مع الكحك والبسكويت علشان تتخنو
وماتنسوووووووووش العيديه لحسن بجد بجد هزعل اووووووووووووووووى لو مااخدتش عيديه

يلا تشااااااااااو
كان معكم من قدام طبق البيتي فور
النجمة المأنتكة
لوليتا هانم السُكرة
ومرافقتها البلونه الخضرة





Saturday, September 20, 2008






نسكافيه بلاك
Vs
كابتشينو من ابو رغاوي



طبعا وكالعاده ماحدش فاهم حاجه

كوبري قصر النيل بالليل والدنيا ضلمة مع حد بحبه Vs كوبري الجلاء وقت الغروب وحدي وماحدش يعمل دوشه
طبعا وكالعادة ماحدش فاهم حاجه


ومن ده كتير

ههههههههههههههه
ماتخافوش لوليتا لسه بعقلها
بس في حالة اذبهلال شويه من كذا موقف حصلولي ورا بعض حسيت فيهم اني دماااااااااااااغ وبعيده عن الدنيا دي كلها
مش هحل الغز اللى فوق ده ولو حد فهم حاجه وفهم قصدي ايه ليه عندي بونبونايه

وده سبب الرسالة اللى على الماسنجر اللى ماحدش فاهمها وعلشان ماحدش يخنقني تاني ويسألني
"لوليتاااااااااا نجمة مأنتكه "
يعني لوليتا نجم عالى ولا حد يقدر يشغلي بالي
طبعا وكالعاده ماحدش فاهم حاجة

رمضان ما بعد الفطار:
احم احم قبل الفطار تقى وورع وصلاة وصوم وغض بصر
بعد صلاة التراويح فوووووول ميكب واللبس لوحده كده بيضيق ويقصر
قبل الفطار قرآن وبرامج دينيه
بعد الصلاة اغاني ورقص للصبح
لا لا مش للصبح لحد التلت التاني من الليل
طبعا وكالعاده ماحدش فاهم حاجه

صلاة التراويح :
مش عارفه الناس مالها ومال صوباع رجلي الصغير
لازم طنطات الستات اللى فى المسجد يدوسو عليه
ياجماعه الراجل بيقول ساوو الصفوف القدم فى القدم مش رجلك على رجل لوليتا
طبعا وكالعاده ماحدش فاهم حاجه

لفيت على مساجد امبابه مسجد مسجد لحد اما لقيت مسجد نضيف وواسع والشيخ صوته حلو
ازمته الوحيده ان الاطفال المتشرده بتاخد ميدالية المفاتيح وانا بصلي يلعبو بيها

الراجل يادوب يقول استقيموا واستوو واعتدلو صلو صلاة مودع
والناس ماتعرفش ايه اللى جرالها تاخد المسجد ذهاب وعوده ولا كأنهم بيطوفو ولازم الشعب كله يقف تحت المروحة

لوليتا والتذاكر:
مااعرفش ايه حكايتي مع التيكتس "التذاكر يعني" مره واحده غلطت وقلت لعمو كومسري الاوتوبيس التيكيت بكام -طبعاً مش هقولكم كان ريأكشنه ايه حفظاً لماء الوجه- ومن ساعتها اتعلمت اقول تذكره
المهم حضرتي بقى بتحب تحتفظ بالتيكتس دي اوى مش عارفه ليه اى تيكيت لاى مناسبه وفي اى وقت
الموقف العجيب اللى حصلي من كام يوم
كنت راجعه من الكورس وركبت الاوتوبيس وقطعت التيكت
كنت لابسه شنطتي السوده ورميت فيها التيكت كالعاده فى الجيب اللى بره
مره واحده جه واحد بيقولي التذكره طبعا استوعبت بعد فتره انه عمو المفتش
فتحت السوسته وببص وكانت الطامة الكبرى
لقيت حوالى كمشكاشر تيكيت فى الشنطه وهذا رقم يصعق زي صاعق الناموس بالظبط
قلتله عمو معلش هو الاوتوبيس تذكرته بكام
بصلي وحسيت انه قرفان وقالى 2 جنيه قعدت ادور ادور ادور لحد مالقيت تذكره ب 2 جنيه
اديتهالو قلتله هي دي قالى لا التانيه لونها اخضر
رحت مطلعاله 10 تذكرات خضر ولسه هقلب فيهم
رحت لقيته بيزعقلي خلااااااااااااااااااااااااااااااااااااااص مش عايز تذاكر انا
صحيح ناقصات عقل ودين
مش عارفه ايه العلاقه يعني


لوست ان يور ايز :

مانا لوست فى الايز بجد واللى كان كان
الميوزك الرائع اللى فى البلوج
مش هشيله واللى يتغاظ يتغاظ
اساسا انا بدخل البلوج علشانه
عالم غريبه اوى فعلا يعني
صحابي الحلوين ايه رأيكم فى الميوزيك



هنضم لحركة كفايه قريب :

ياما كنت اتمنى قابلك ببتسامة
او بنظرة حب او كلمة ملامه
بس انا نسيت الأبتسام
زي ما نسيت الألام
والزمن بينسي حزني وفرحي ياما


الليل
ودقت الساعات تصحي الليل
الليل
وحرقة الأهات في عز الليل
وقسوة التنهيد
والوحده والتسهيد
لسه ما همش بعيد
وعايزنا نرجع زي زمان
قول للزمان ارجع يا زمان
وهات لي قلب لا داب ولا حب
ولا انجرح ولا شاف حرمان

بيني وبينك وهجر وغدر وجرح بقلبي داريته
بيني وبينك ليل وفراق وطريق انته اللي بديته
بيني وبينك ليل وفراق وطريق انته اللي بيدته

وليس لديا اقوال اخري
كفاية بجد تعبت بقى


يعني ايه يافندم مش فاهمه:
يعني ايه واحد يكون بيحب واحده والواحده دي ليها صاحبه انتيم وعارفه كل مواضيعهم سوا
يجي يتهبل مره ويقول للصديقه دي انا بحبك انتي وعايز اسيب صاحبتك ومش عارفه

يعني ايه واحده تحب واحد حتى شاكه انه ممكن صاحبتها تكون بتحبه







وهذه كانت اخبار الأربع وعشرون ساعة
او ال15 يوم
شوية فضفضه لحسن كنت خلاص هفرقع بجد
وكنت هنزل بوست كئيب زياده عن اللزوم
قلت اهيس شوية وبعدين اكئبكم معايا
ماتنسوش الدعاء لي فى العشر الاواخر
كان معكم من امام الكي بورد
البونبوناية المسكرة
النجمة المأنتكة
الست لوليتا صاحبة البلوج